الدنيا الملعونه
(الدنيا الملعونه)
بقى مبدأ ف الدنيا وسايد
عايز فيها تعيش اتنازل
عن كل مشاعرك ومبادئك
غير ف ملامحك وف شكلك
خليك واعي تملي وشاطر
ا.~.~ ~.~ ~.~ ~.~.ا
أخرج من جواك للناس
سيبك من دنيا الإحساس
دنيا محدش أصبح فيها
فوق مبقاش في شيء ببلاش
ا.~.~ ~.~ ~.~ ~.~.ا
لغبط ف مشاعرك وضميرك
فكر فيك سيبك من غيرك
حاول تخرج من إحساسك
ف الشده محدش هيشيلك
ا.~.~ ~.~ ~.~ ~.~.ا
إبني ف نفسك هد ف غيرك
كتر شرك قلل خيرك
زَييف وشك وسط الناس
الكل يحبك ويجيلك !
ا.~.~ ~.~ ~.~ ~.~.ا
ملعونه الدنيا بشياطينها
واللي بيركع وبيخدمها
واللي يصقف واللي يطبل
واللي يكون من بني آدمينها
ا.~.~ ~.~ ~.~ ~.~.ا
أحكام ف الدنيا بتتنفذ
واللي بيأمر واللي ينفذ
واللي بيتفرج ويشاهد
واللي الحكم عليه يتنفذ
ا.~.~ ~.~ ~.~ ~.~.ا
فيها اللي بيضحك ويعيط
فيها العبد وفيها السيد
عبد المأمور والمأمور
اللي بيدفن قلبه الميت
ا.~.~ ~.~ ~.~ ~.~.ا
لحظات الحب المعدومه
ووشوش البشر الملعونه
صبحت هي الدنيا كذلك
إحساس ومشاعر مدفونه !
إحساس ومشاعر مدفونه !
ا.~.~ ~.~ ~.~ ~.~.ا
ا.~.~ ~.~ ~.~ ~.~.ا
إبراهيم سعيد
Ibrahim Said