أصحاب قُدام
( أصحاب قُدام )
لو غبت يوم أو غاب ف يوم عني القلم
برجع قوام وارتاح ف حضنه لما يتعبني الزمن
وف فرحتي بلاقيه معايا
وف شدتي، قبل الجميع ياخد بإيدي، يدلني لبر النجاه
ماهو ف الحياه من غير صديق ازاي نعيش
وانا والقلم أصحاب قُدام
هو اللي عرفني الكلام
ونطقت بيه أول حروفي على الورق
ورسمت بيه عالم كبير
وف شدتي كان الدليل
وف غربتي ياما خد بإيدي ف وحدتي
كان هو نجمي ف ضلمتي
كان هو فجري اللي ساعدني ف ليل طويل
انا والقلم أصحاب قُدام
**************
صديق وفي أقربلي من نفسي
طوق النجاه من موج بحور يأسي
جبهة حِما م الهم والأحزان
نجـم ف سما مليانه بالدخان
شراع سفينتي وبوصلتي وربان
لما بحس بخنقتي وبضيقتي وبحزني
بلاقيه ونيسي ف وحدتي، بأمان يحسسني
بيخف عني غصـب عني دايماً بفكر فيه
لمّا تزيد الحيره فيا، لمّا يفيض بيا
بجري بلهفه عليه
********
مانا والقلم أصحاب قُدام
هو اللي عرفني الكلام
ونطقت بيه أول حروفي على الورق
ورسمت بيه عالم كبير
وف شدتي كان الدليل
وف غربتي ياما خد بإيدي ف وحدتي
كان هو نجمي ف ضلمتي
كان هو فجري اللي ساعدني ف ليل طويل
****************
دايماً سوا مع بعضنا مبنختلفش
الرأي واحد والحلم واحد
نفس المبادئ
مبنتخاصمش
علشان بيجمعنا تملي نفس الشعور
بنحب تغريد الطيور
بنحب تغييمة السما، بنحب المطر
بنحب لون الخضرا، بنحب الزهور
بنحب إن يحبنا غيرنا
ونفرح لما بنريح ضميرنا من الذنوب
بنحب نعمل خير تملي
والناس ف ضهري ممكن تخلي
طيبتي وشهامتي من العيوب
نفس الألم بيكون واحد فينا
اللي بيهدم واللي بيبنينا
اللي يفرّح واللي يبكّينا
اللي بيوجع واللي يريحنا
كل الأمور، نفس الحياه واحده
ف الكبرياء وكرامة الإحساس
ف الانفعال من رد فعل الناس
****************
مانا والقلم أصحاب قُدام
هو اللي عرفني الكلام
ونطقت بيه أول حروفي على الورق
ورسمت بيه عالم كبير
وف شدتي كان الدليل
وف غربتي ياما خد بإيدي ف وحدتي
كان هو نجمي ف ضلمتي
كان هو فجري اللي ساعدني ف ليل طويل
أنا والقلم أصحاب قُدام
أصحاب قُدام
---------------------------------
---------------------------------
إبراهيم سعيد
Ibrahim Said