| علامات الموت |
أحلامي المدفونه ف قلبي
وبواقي الضوء اللـ باقيلي بينورلي
والضلمه اللـ بتنهش أملي
كلها علامات....
توصف وتدُل على نهايتي
********************
إنسان عاش عمره
مأذاش بني آدم ولا كائن حي
إنسان قضى عمره
ف الدنيا يعافر عشمان ف الجي
إنسان اتغرب واتبهدل جوه بلاده
ولا عاش يوم حلو
إنسان اتمرمط ع الأخر
من جوه اتشل
********************
علامات الموت
بانت على قلبي خلاص
علامات الموت
اتطبعت ف جبين الإحساس
********************
علامات الشيب اللـ بتنحل
ف مشاعر ماتت من بدري
وف حلم اتوفى ف مستشفى
مبنيه ف قلبي المهدود
فطبيعي يموت
وطبيعي بموته محدش يعرف غير صاحبه
والدفنه تتم بدون إعلام وكلام أو صوت
علامات الموت
********************
علامات الموت
بانت على قلبي الشايب ف شبابه
اللـ اتحول من بني آدم لجماد
مفيش واحد امنه وحبه إلا وسابو
من كتر الصدمات اتحول صوته لسكات
********************
علامات بارزه، ظاهره وواضحه
من كتر الوجع الملعون
من شدة أحزان الوحده
والأمل اللي بيخفت ويموت
********************
والشكل الظاهر للناس
بيبان مُفرح
بملامح تسعد وبتشِرِح
عكس اللي بيحصل جوايا
وكإني هدف نادي رمايه
لكن نادي مِلك الأشباح
كله بيرمي ويسيب ف جراح
ويساهم ف بلوغي نهايه
من أسوء نهايات الحكايات
تتجمع أشباح الأموات
كائنات تتسبب ف أذايا
********************
والبهجه اللي تبان على وشي
والأمل اللي بيملك حسي
كلها أوهام لابساني وبتغطي ف جسمي
شكلي مهوش شكلي
حسي مهوش حسي
كل اللي يبان للناس بره
أشياء وحاجات عكس حقيقتي
********************
متجمع جوايا مشاعر
كلها بتحاول وتعافر
علشان تقتلني وتمحيني
وبحاول أن انجى بنفسي
فلقى الأوجاع تمسك قلبي
وبتنسف كل اللـ حاميني
والنبض اللـ بيخرج مني
يخرج وياه دمع ف عيني
والباقي من الأمل استسلم
وقِبِل يرفع راية استسلام
والفرح اللـ ف قلبي اتقِّسم
اتنفذ فيه حكم الإعدام
********************
وباقيلي بواقي بجَّمعها
تخرج ضحكه لكن بتموت
أو تخرج على شكل كلام
متقطع فاقد للصوت
ويُعم ف قلبي صمت رهيب
يمحي وينسف جوايا بيوت
كنت بانيها، بتعيش فيها
أحلام خضرا وآمال من ضوء
كلها راحت صبحت أطلال
واتحول قلبي لبحر رمال
بيغطي معالم قلبي برمل
بقى زي المبنى المهدود
قلبي بيموت لكن على مهل
بيخلّص في بواقي سنينه
علامات الموت قسمت قلبي
بانت واترسمت ف جبينه
علامات الموت
********************
********************
إبراهيم سعيد
Ibrahim Said