| سور |
بينا وبين أحلامنا سور
عالي أوي، واصل لأطراف السما
وليل محاوطو لوه نياب زي الوحوش
لما نقرب منه نتصاب بالعمى
نلقى الخَضار بقى أرض بور
/////////////////////////////////
نلقى الحياه لونها بيتبدل صفار
صحرا كئيبه بدون أمل
مفهاش ولا حتة عمار
مليانه بفحيح الأفاعي المرعبه
اللي بتقتل فينا أحلامنا الصغار
ووهم يسري فينا يصبح أوبئه
وأرض نمشي عليها تتحول لنار
وعقارب اليأس اللي فينا بتزرع سمها
وجبال بعيده فيها ناس ولا هَمَها
م دام بعيده وأهلها عن الدمار
/////////////////////////////////
بينا وبين أحلامنا سور
احنا الشباب
احنا اللي شيبنا لما صابنا الاكتئاب
بنعيش حياه فيها الأمل مكتوب غياب
لما العداله بقت شعار
والحق باطل
والباطل الحق اللي صار
شباب كتير ف الحلم عاطل
وشباب قتلها الانتظار
/////////////////////////////////
بينا وبين أحلامنا سور
أحلام كتير منها بسيطه
من قهرها صابها الضمور
فتحولت فجأه لمصيبه
زودت فينا الهموم
خلت الدنيا كئيبه
/////////////////////////////////
بينا وبين أحلامنا سور
كل يوم بيعلى أكتر
والليل مغطي كل شبر من المكان
والوحوش حواليه بتكتر
واليأس زارع سمه بين طوب الحيطان
لو حاولنا لحلم نوصل
م الثواني الأولى نخسر
ننهزم شر انهزام
اللي مَوّت كل حلم يا سيادنا
انعدام الاهتمام
انعدام الاهتمام
إبراهيم سعيد
Ibrahim Said