| وِش الفضيله |
مفيش ف الدنيا أي أمان
قلوب الناس بقت مليانه كدب وزيف
دي حتى اللي بانتلي ملاك
وفيها التقوى والإيمان
وطيبة قلبها اللـ نضيف
طلعت ف الحقيقه شيطان
بيخدع فيا...
بيلعب بيا...
خسيس جداً بقلب جبان
---------------------------------------
لاقيت براءة الطفله بالنسبه لها
مجرد مَسك
لاقيت التقوى والإيمان ف أفعالها
ستار بيداري كدب وفِسق
---------------------------------------
حاجات فعلاً تقف قدامها تستعجب
تحس بألف سكينه بيطعنو فيك ف ألف مكان
وتبدأ حالة اللاَّوعي تتصارع معَّ وعيك
فتدخل حالة الهذيان
---------------------------------------
وتلقى المعرفه جواك تعبر بس عن جهلك
عدم فهمك لأشياء شاذه من حواليك
فتشعر بيك بتتقطع وبتموت فيك على مهلك
تلاقي تجربه جديده تُضاف لتجاربك الفاشله
وما أكترها يا قلبي
بقيت من كُترها مخزن، مِخزّن فيه
تجارب تكفي ناس ياما
مشوهه كل ايامك
مقسمه كل أحلامك
لميت حته
ومتعشم تملي الخير
يجيلك في نهار بكره
---------------------------------------
لأول مره اقابل واحده مُنفصمه
بتعمل عكس ما بتقول
بتنصح بالفضيله وهي ف شرها كالغول
تناقض تام
لما تبص ف عيونها
تلاقي ملاك بريء جداً مهوش إنسان
لما بتبتدي كلامها
بترتاح وانت وياها تحس أمان
---------------------------------------
لأول مره اعيش حيره
تكون أكبر من المعتاد
انا بالذات....
عشان من كتر ما جربت
قابلت وشوفت....
ياما حاجات
ولكن كانت الحيره ف تلك الحاله اكبرهم
عشان وشها فعلاً دا يخدع جن
عيونها الصافيه دي ف لحظه تتوه منهم
كإن عيونها بحر من الصفا والصدق
متتوقعش سوء منها فمتقدمش سوء الظن
مجرد نظره ليها تلاقي القلب فجأه يحن
كإنها لوحه مرسومة بفكر وفن
---------------------------------------
خساره يا حظي ف الدنيا
بقابل بس ناس وحشه
ياريت بيبانوا في الأول
اقله الصدمه تبقى أخف مش ضخمه
---------------------------------------
بقابل كل شيء سيء ومليان شك
وبنهي التجربه تايه بين الباطل وبين الحق
لا عارف مين اللي يتكدب ولا مين اللي يتصدق
ف وقت الكل فيه كداب
وفيه الكدابين متقسمين أحزاب
أقلهم ف الكدب يخدع م البشر كام ألف
نصيحه بلاش تأمن حد دلوقتي
بلاش وش الفضيله يوقعك ف الفخ
---------------------------------------
نصيحة لكل طيب ف الزمن الاغبر
بلاش تصدق واوعى تاخد بالمظاهر
عشان بقى فيّ بشر دلوقتي تقدر
تبان زي الملايكه بوش آسر
في ناس زي الأبالسه بشكل مُبهر
هتخسر لو آمنت وتبقى جاهل
---------------------------------------
بلاش وش الفضيله يغُر قلبك
وتصدقه فيوقعك جوه المهالك
وحرص م اللي بيقولك بحبك
يكون جمبك ف فرحك يسيبك ف الشدايد
مفيش غير شخص بس تآمنه (نفسك)
عشان الصدق أصبح م النوادر
وحَكِّم في الأمور الصعبه عقلك
وكن دايماً حريص وخلي بالك
حقيقة الناس بقت دلوقتي تقلق
قلوب ملعونه خاليه من المشاعر
قلوب ملعونه خاليه من المشاعر
---------------------------------------
---------------------------------------
إبراهيم سعيد
Ibrahim Said