لا صوت ولا صوره
وبنقابل يا قلبي ف ناس.. وبنفارق
وبنشوف ف الحياه أصناف.. ما تتعاشر
وبنعيش الحياه أوقات كما التايهين
وبنسيب اللي يرغبنا
ونشتري ف الناس البايعين
***********************
حياتنا تملي مليانه تناقض واختلاف بيِّن
وناس ف الدنيا أفعالها تخلي العقل يتجنن
وجوه تتشاف وجوه شياطين
خبيثه ورافضه للرحمه
قلوبهم مش لبني آدمين
بتفرح لما تجرحنا
بتنسى وعادي بتسيبنا
ف عز الشده والحاجه
واكبر حاجه بتعيبنا
طيبتنا اللي بتتمادى
***********************
ف دنيتنا بشر ما يساوو حتى تراب
بينهشوا ف الحقوق ككلاب
كلاب سعرانه مبترحمش، ولا بتُعذر
شياطين رافعه راية الحرب
تحطم غيرها وبتكسر
***********************
وصلنا ان الوشوش دلوقتي ملعونه
قبيحه لا صوت ولا صوره
مفيش جواها ذره من وجود إحساس
بُعاد عن عالم الرحمه مهمش ناس
قلوبهم سوده فيها الرحمه مبتوره
***********************
بقينا زي فيلم كئيب
لمخرج أصله نبت شيطان
لا شايفنله وجوه واضحه
ولا سامعنله صوت انسان
صور بهتانه مش باينه
وأصوات زي همس الجان
***********************
لا صوت ولا صوره بتريح
كلام باهت ومش متشاف
قلوب مبنيه بحجاره
بتزرع سمها ف الناس
***********************
دا أصبح وضعنا الحالي
وشكل الدنيا م الخارج وم الداخل
ف ناس عايشه وبتعافر
عشان تعيش كما المفروض
عشان بتحب بعض الناس
وناس جواها شيطان كافر
بينشر كل شيء فيه موت
مفهش لا رحمه ولا إحساس
***********************
***********************
إبراهيم سعيد
Ibrahim Said