في الزحام

| واحد من الناس |

(واحد من الناس)

ــ_-_-_-_-_-_-_-_-_ــ

ــ_-_-_-_-_-_-_-_-_ــ

أنا عكس الناس انا ماشي

وبحس ان انا مش ماشي

مع طبع الناس والدنيا

على أدي بخطي الخطوه

والدنيا كبيره وواسعه

وف عيني صغيره جداً

أضيق من خرم الأبره

أنا واحد عايش صفر

والسهل ف دنيتي صعب

علشان مش حاسس بيه

نَفَسي من كتر الجري

من حرقة دم وهري

مش قادر حتى الاقيه

شوف لما تكون إنسان

عايش من غير إنسان

تتوقع هتكون ايه

تايه ضايع مش عارف

ليك عين لكن مش شايف

ليل ماشي لوحدك فيه

مشروخ من جوه وميت

مع كل الدنيا بتعند

علشان مش لاقي شبيه

لو حتى حاولت تغير

من نفسك أو تتغير

قلبك بيقولك ليه؟

مخلوق ودي خلقة ربك

بتشكك ليه ف مشاعرك

ليك عقل تفكر بيه

ف نهاية سفري ف نفسي

والتفكير أوي في مشاكلي

الحل لقيته خلاص

أنا مش هتغير أبداً

وهعيش بطبيعتي وهقبل

بحياتي وبالإحساس

وأكيد في ناس كده غيري

نفس كياني وتفكيري

يبقى انا ليه بقى محتاس

دا أكيد بالصبر هحقق

أحلامي وهبدأ اصدق

إن انا واحد م الناس

ــ_-_-_-_-_-_-_-_-_ــ

ــ_-_-_-_-_-_-_-_-_ــ

إبراهيم سعيد

Ibrahim Said