| عنواني القديم |
عنواني القديم
نمره واحد شارع الأحلام يمين
عند ناصية الأمل
في بلاد الطيبين
في وطن كان لسه عايش فيه بشر
عندهم رحمه ودين
--------------------------------------------
كنت عايش ويا ناس فيها الضمير لساه سليم
فيها إحساس كان شجاع
لم يخاف أو ينحني من برد أو شدة رياح
في بلاد فيها براح
--------------------------------------------
أما عنواني الجديد
اللي هو نمره صفر
شارع اليأس البعيد
وسط ليل اسود وحالك
زي حالك يا بلادي
في وطن أصبح مريض
زي غابه
القوي ياكل الضعيف
والوجوه مليانه زيف
والوسخ بيبان نضيف
واللي بيموت الغلابه
--------------------------------------------
عنواني القديم
اللي ياما واحشني ياما
اللي نفسه ارجعله يوم
لو تقوم بعده القيامه
يوم اعيشه مع حبايبي وسط أصحابي القُدام
اللي من يوم م افترقنا واحنا مش حاسين سلام
اللي منهم عاش بعيد واللي مات مهموم وحيد
واللي ضاع وسط الزحام
--------------------------------------------
فرحي غاب، قلبي دايب ف البعاد
والسُكات المُر دايماً والوجع بيهد فيه
ذاتي شابت حسره ع الأمل اللي مات
حتى صوتي من سكاتي بقيت ناسيه
--------------------------------------------
عنواني القديم
يا واحشني
نفسي ارجعلك ونفسي...
انسى همي وانسى تعبي
واهزم الوجع اللئيم
يرجعوا الأحباب ف حضني
والألم يبعد، يسيبني
يختفي الظلم الذميم
--------------------------------------------
نفسي أرجعلك يا وطني
تبقى عنواني وبيتي
والأمل يرجع وصوتي
يحيا من بعد الممات
يرجع الوقت اللي فات
لما كنا فيه بشر
كنا أرحم مخلوقات
جوه منها فيه ضمير
قلب بالأخلاق سليم
هو دا بالظبط يبقى...
وصف عنواني القديم
--------------------------------------------
--------------------------------------------
إبراهيم سعيد
Ibrahim Said
🌺🌺 جميله
ردحذفانتي الأجمل 🌺 شكراً جداً لتعليقك الجميل ورأيك اللي أسعدني 🌺
ردحذف