مِن الناس اللي تحت الأرض
إلى الناس اللي ساكنين فوق
أمانه تبصوُ تحتيكوُ
على الناس اللي شِبعت موت
هَنكدب لو تَخيلنا الأمل فيكوُ
وِلَكـن ،،،،،،
في كَـلام جوانا ورسايل
على الحال اللي بقى مايل
على الناس اللي محتاجه
ومش لاقيه اللي يديها
على ناس ف الحياه تايهه
وعايزه الحق يهديها
على الناس اللي يومياً ،،،
بتشحت م الحياه لحظه تعيش فيها !
على الناس اللي م الأحزان، بقت بتنام
مفتحه عين، مغمضه عين
لاهم صاحين ولا نايمين
من الناس اللي شبعت موت
ف هم الدُنيا وظروفها
على أمل ان تيجي ف يوم
وتلقى حَـد ينصِفها
ف دُنيا بقت مخاصمه الحق
بتتعاون مع التزييف
ف بيئه فاسده مبقاش فيها حد نضيف..!
من الناس اللي تحت الأرض
إلى كل اللي بيدوسنا
ياريت لو بس تتحرك مشاعركم
وتقدروُ مره واحده تحسوُ بظروفنا
مِن الناس اللي أكبر حِلم حِلمت بيه
وما زَالِت بتِحلم بيه ،،،،،
تعيش مستوره ف الدُنيا
ويتعاملوُ كَبني آدمين
تعيش مش خايفه مرعوبه
لاحد يدوسها أو ينهش أمل عايشاه
مَتبقاش عايشه مغصوبه
على دُنيا ناقِصها حياه
إلى الناس اللي ف العالي
ومش شايفه اللي أسفلها
أمانه عليكوُ حاسبوُ تدوسوُ عالغلبان
مَهُوش نمله دا برضو ف الأخر إنسان
مِن الناس اللي تحت الأرض
إلى الناس اللي ساكنين فوق
إبراهيم سعيد
Ibrahim Said