| ع الأرض قول السلام |
| ع الدنيا وم فيها |
بتقولي اي يابا ....
الدنيا لســه بخيـر!!
طب قولي فين الخير؟؟
دا الخير ف زمنا يابا أصبح ملهش مكان
واللـي بيعمل خيـر عليـه يقولـه جبــان
الخير ف زمنا ضعف
بقى شيء بغيض وكريه
والشر هو السيد ف ضمير بني الإنسان
-------------------------------------
شايف بعيني الناس بتاكل ف بعضيهـا
وناس كتير طماعه بتاخد اللي مش ليها
الشر بقى لوه سلطه ف الناس بيتحكـم
ع الأرض قول السلام ع الدنيا وم فيها
-------------------------------------
خدني ف حضنك يابا حسسني ان انا حي
قلبي صبح ضلمه مفهش نقطة ضي
عينيا مش شايفه ف الدنيا بني آدمين
والدنيا يابا خلاص ميزانها مال واختل
-------------------------------------
دنيا بقت ماشيه بالعكس والمقلوب
فيها القلوب ماتت ، بقت حجاره وطوب
وانتا اللي أحضانك بحس فيها براحه
وانتا الوحيد يابا بحكي معاه وبقول
-------------------------------------
الماده هي الغايه ومش مهم ازاي
الكل بقى يتنكر بميت قناع لواي
ولا حد عارف حد في مسرحيه كبيره
تحس إن الخير ف الدنيا راح مش جاي
-------------------------------------
البعد عن ربنا غير طباع الناس
عايشين ف دنيا غبيه معدومة الإحساس
عصيان وفتنة شيطان بيهم خلاص ضايعين
مات الضمير فينا وبموته موتنا خلاص
-------------------------------------
أيه ننتظر تاني بعد الضياع منا
ف الخير تقيله الخطوه مش راضيه تحملنا
أوشكنا نبقى الشيطان ف الشر والأعمال
نختار طريق الهلاك برضانا وقبولنا
-------------------------------------
شايف بعيني الناس بتاكل ف بعضيهـا
وناس كتير طماعه بتاخد اللي مش ليها
الشر بقى لوه سلطه ف الناس بيتحكـم
ع الأرض قول السلام ع الدنيا وم فيها
-------------------------------------
اللي يحبك لازم يكون عايز حاجه
واللي بيضحك في وشك ، برضو عشان حاجه
تشك حتى ف نفسك وكل من حواليك
اللي بقوله غلط ؟؟ ما ترد بقى يابا ؟
-------------------------------------
تايه ف وسط الناس مش لاقي ليا طريق
كل اللي جوايا هموم وخنقه وضيق
محتار ف كل الوشوش
قولي أكدب مين ولا أصدق مين ؟
-------------------------------------
خدني ف حضنك يابا حسسني ان انا حي
قلبي صبح ضلمه مفهش نقطة ضي
عينيا مش شايفه ف الدنيا بني آدمين
والدنيا يابا خلاص ميزانها مال واختل
-------------------------------------
شايف بعيني الناس بتاكل ف بعضيهـا
وناس كتير طماعه بتاخد اللي مش ليها
الشر بقى لوه سلطه ف الناس بيتحكـم
ع الأرض قول السلام ع الدنيا وم فيها
إبراهيم سعيد
Ibrahim Said