في الزحام

| كان نفسي |

كان نفسي

والله كان نفسي

أعيش معاك عمري

واشوف معاك حلمي

جمبك بيتحقق

والله كان نفسي

أنسى الآهات والجرح

واعيش ساعات الفرح

اللي بتوحشني

والله كان نفسي

الحلم يتحقق

وكل شيء مؤذي يبعد ويتشقق

يصبح رماد من نار ف لحظه واحده يطير

واخرج من الأوجاع بعد امّا كنت أسير

وف النهار امشي من بعد عتمة ليل

في ضوء منورلي كل اللـ كان أغمق

كان نفسي اشوف قلبي عايش سعاده بجد

كان نفسي لما احضنك الحزن دا يتهد

يصبح ملهش وجود زي الغبار على الأرض

كان نفسي ف وجودك ابني معاك الغد

كان نفسي اعيش وياك

ف بيت بيجمعنا وفيه ملايكه صغار

الدنيا تتلون بضحكة الأطفال

حياه تكون دايماً خاليه من الأسرار

فيها مشاكل يمكن، لكنها بتتحل

عمري م يوم ازهق منك أنا او امِل

ولو زعلنا ف يوم تصالحنا أحضان بعض

وخصامنا ف الغالب عن يوم مبيطولش

كان نفسي حب يعيش والاقي فيه النبض

كان نفسي يبقى مفيش ف بينا فُرقه وبُعد

كان نفسي بيك اقدر اخطي كل الصعب

كان نفسي اشوفك ضي

وعيون اشوف بيها

حياه ماليها الفرح

انت اللـ تحييها

كان نفسي

كان نفسي مااا تخلفش،،، الوعد لما وعدت

كان نفسي تبقى بجد

بشكل م تخيلت

تبقى كما اتمنيت، كما بقلبي حلمت

شوفتك بعيني عوض عن كل ما فاتني

شوفتك أمل جالي بفرح عوضني

عن عمر عدا وراح، وضمير مآنبني

عن كل يوم انتهى ملمحتش الفرحه

عن كل شِبر اتملى ف قلبي بالوحده

عن كل يوم عشته وكإني مااا عشته

عن كل حلم قلعته من بعد م لبسته

وكان مقاسي ولكن باليأس انا خسرته

شوفتك كتير جداً

حاجات تخلي الصعب والمستحيل ممكن

شوفتك كما اتخيلت، وبهذا التخيُل عشت

لكن مع الأيام فهمت انا وعرفت

وقلت يااااا ريتني م كنت يوم شوفتك

علشان حاولت كتير وطلعت انا موهوم

حنيتك شحه والشوق مهوش عندك

البعد كان بيزيد وبتقسى يوم عن يوم

قلبك مهوش ليِّن

ممكن تسيبني ف وجع وتبعني بالهيِّن

كسبت ايه بوجودك، زيي مانا محروم

ولا حب حسيته من ناحيتك بيدوم

طول عمري انا محروم

من كل حنيه .....

من كل كلمة حب تزرع أمل فيا

من كل إحساس سعاده

احسه من انسان بيرتبط بيا

ايه اللي شوفته معاك

يميزك عن حد

وشوفت ايه ف هواك

غير بس قسوه وبُعد

كان نفسي اعيش وياك

وابني معاك بيتي

وسعادتي تبقى معاك

وتاخدني م الماضي

من كل ذكرى والم

من حزن كان طاغي

ولاقيت دا وهم كبير وشيء ملهش وجود

قادر ف لحظه تفارق وتكون كمان مبسوط

عايز تبان اقوى ف البعد مهما طال

حتى الكلام الحلو ممنوع كمان يتقال

بستغربك فعلاً واستغرب الأفعال

كان نفسي

كان نفسي؛ لكن النصيب رافض

انك تكونلي شريك، تشاركني احلامي

انك تكونلي صديق، تشاركني أيامي

انك تكونلي رفيق لحد يوم موتي

انك تكونلي حبيب عايش على وجودي

يمكن يكونلي خير، يمكن يكونلك خير

يمكن عشان فعلاً ف الدنيا حظي قليل

عايش أقول دايماً ف الدنيا كان نفسي

على كل شيء عايزو لما اتنبح حسي

بطلب حاجات عادي مش بطلب المعجزه

لكن بنوك حظي ف الدنيا دي مفلسه

مفهاش ولاّ ملي شايل حاجه كويسه

وبجملة الأوجاع " كان نفسي " اعيش وياك

وتكون صحيح شبهي...

حنيتي وطيبتي...

وتحس م ف قلبي...

لكن هقولك ايه.... غير بس " كان نفسي "

" كان نفسي "

إبراهيم سعيد

Ibrahim Said