في ملكوت الحياه والكون
بدور يمكن القى بشر
بفتش في قلوب وعيون
بقول جايز الاقي أمل
بلـف شمال والـف يمين
في ناس توصفني مالمجانين
وناس توصفني مالعاقلين
وناس بتقول دا يطلع مين
*****************
كإن انا جيت في وقت بجد مش وقتي
كإني بقيت............
أثر صورة بشر من وقـت فـات
اللي بيبعد عني ويحسسني اني مرض مُعدي
واللي بيستغربني...........
كإني بقيت شبح لإنسان مات
بقي ليا وش من الخشب مدهون بلون اسود غميق
دا مش نفـاق مني ولكن، قلبي بدأ ينسى الطريق
انـا كـل يـوم مـاشي بـدور في الوشـوش
وبقيت بشوف كره وسواد بقى في النفوس
عَندي أمل لكن ضعيف
إحساس كريه ومش لطيف
انك تعيش كده والسلام
وتموت معانيك في الكلام
وفي النهار تصبح كفيف
*****************
في ملكوت الحياه أصبحت
واحد تايه بيشحت أمل
مكان م ابدأ الاقيني رجعت
وايه الحل؟ ايه العمل؟
بقيت شحـات أمل وحياه
ملامح قلبي خايف انساه
واكون واحد غريب عنـي
وقلبي يتوه ومش هالقاه
وانا من خوفي في الضلمه
بقت عايش على كلمه
وخايف هي برضو تضيع
واموت م الحيره والوحده
بدور عالأمل ف حياه
وبدعي ف حزني "يا ألله"
واتمتم بكلام وكلام
كتير مالناس مهش عارفاه
ومش حاساه ،،،،،
ومش عارفه كمان معناه
*****************
في ملكوت الحياه والكون
بدور يمكن القى بشر
بفتش في قلوب وعيون
بقول جايز الاقي أمل
بلف شمال والف يمين
في ناس توصفني مالمجانين
وناس توصفني مالعاقلين
وناس بتقول دا يطلع مين
إبراهيم سعيد
Ibrahim Said