بياع جوال
قرب واختار
وبأرخص سعر ي بلدينا
وبأرخص سعر ي بلدينا
اخلاق للبيع، وضمير تجميع
قول سعرك يـَـلا وورينا
ـــــــــــــــــــــــــــــــــــــــ
في حلم كبير بقى حلم رخيص
ف حزام الهم للتخسيس
قرب واتفرج واختار، واشتري مني
دي حاجات أصليه ومش تقليد
ـــــــــــــــــــــــــــــــــــــــ
ومفاجآه كمان فوق البيعه
علبة كبريت أو ولاعـــه
كل م تشتري تاخد اكتر
قربوا واشتروا بقى يا جماعه
مين عايز طيبه وإحساس
مين عايز ياخونا شجاعه
ـــــــــــــــــــــــــــــــــــــــ
أهو واحد جي ي فرج الله
ــ عايز ايه أمر يلا ي بيه
واللي انتا هتآمر بيه تلاقيه
انا عايز ...............؟
اتفضل قول،،،،،،،،،،
ــ لو عندك يعني نفاق أو شر
أو قسوه وكدب... شوية غـل
ـــــــــــــــــــــــــــــــــــــــ
لو موجود قول اشتري منك
وبسعرك اللي انتا تقوله
وكمان هحكي للناس عنك
وف ناس ياما كتير هيجولك
ـــــــــــــــــــــــــــــــــــــــ
ــ آسف شوف غيري اسأل عنده
اصل انا مش تاجر في الممنوع
لكن ف ضمير وحاجـات زيه
واطمن مش هتموت مالجوع
ـــــــــــــــــــــــــــــــــــــــ
ــ لا شكراً كده كتر خيرك
مين اللي اتجنن ويجيلك
دي بضاعتك خسرانه ي خينا
عيش أيـامــك كــده زيـانـا
وبيع المطلوب،،،،،
علشان الممنوع بقى مرغوب
واللـ انت داير بتبيعه
مبقاش ف زمنا خلاص محبوب
اصرخ نادي وتف ف وشي لو جالك حد
احسنلك اخرج مالدنيا علشان حاجتك خسرانه بجد
ــ يا سعادة البيه خسران دنيا كسبان آخره
وهنـادي وهفضل مُتمسك كـده بالفكره
إبراهيم سعيد
Ibrahim Said