لا تتصنع

بقينـا لقمـة عيش

بناكل بعض ونغمس

بصرخة غيرنا نتونس

بنجري في سباق خسران
-----------------------------

بناكل لحم بعضينا  

وصوت الحق يإذينا  

مفيش واحد قابل فينا 

يكون ف الدنيا دي إنسان 

-----------------------------

قرارنا تملي متأخر 

ودايماً الشيطان أشطر  

يدلنا ع اللي يهلكنا  

ضميرنا لاحولَ ولا قوة 

حيـاه مبنيـه ع القوه  

مفيش حاجه توقفنا  

-----------------------------

وايه أخرتهـا مش عـارفين  

م بين عايشين ومش عايشين  

مفيش رحمـه ولا إحســاس  

مبقناش يعني بني آدمين ؟!

-----------------------------

المظلوم بقى الأهبل 

والظالم بقى الشاطر 

ودايماً اللي يتكعبل

يشيل م الهم عالآخر

طوفان الشر مستعجل 

ياخد بالدور واحد واحد

لازم دايماً تكون أسرع 

تكون ظالم، تكون جاحد

-----------------------------

قلوبنا خلاص بقت ف الدنيا مش هي
ومشاعرنا بقت أغلبها ممحيه
بقينا رفوف من المعدن 

فوقيها تــراب وتحتيهـا 

وعن أبليس بقينا العن 

تيران تقتل ف بعضيها

ولو تقدر ويستحسن 

تكون أكبر شيطان فيها

-----------------------------

وايه أخرتهـا مش عـارفين 

م بين عايشين ومش عايشين 

مفيش رحمـه ولا إحســاس 

مبقناش يعني بني آدمين ؟!

-----------------------------

بقينا ف دنيا مرسومه بلون اسود

وجوه سوده، قلوب سوده 

دي حتى ايامنا من أعمالنا 

بقت سوده 

تحس اللون دا جوانا صَبح موضه

-----------------------------

وبنكابر ونتجادل وبنعاند ف نفسينا

وف اللحظه اللي بنفكر 
وكان مفروض نقول فيها 

 يارب ارحمنا واهدينا 

نلاقي ضميرنا متسمر كما فرعون 

لآخر لحظه عاش جاهل ومات كافر 

وادينا وراه ..........
قبلنا بجهلنا، رضينا

-----------------------------

وايه أخرتهـا مش عـارفين 

م بين عايشين ومش عايشين 

مفيش رحمـه ولا إحســاس 

مبقناش يعني بني آدمين ؟!

مبقناش يعني بني آدمين ؟!

إبراهيم سعيد

Ibrahim Said